Kursk və Bryansk vilayətlərindəki terror aktları nəticəsində dəymiş zərərin miqdarı açıqlanıb

Rusiyanın Kursk və Bryansk vilayətlərində törədilən üç terror aktı nəticəsində dəyən ziyan 1 milyard rubldan çox olub.

“Report” TASS-a istinadən xəbər verir ki, bu barədə Rusiya İstintaq Komitəsinin rəhbəri Aleksandr Bastrıkin Rusiya Prezidenti Vladimir Putinin hökumət üzvləri ilə görüşündə bildirib.

“Terror aktları nəticəsində dəymiş ziyanın ümumi məbləği 1 milyard rubldan artıqdır. Terror aktının təhqiqatı FTX və Rusiya Daxili İşlər Nazirliyi ilə sıx əməkdaşlıq şəraitində aparılır”, – o deyib.

Bastrıkin həmçinin qeyd edib ki, partlayış zamanı Bryansk vilayətində qatarla körpünün dağıldığı partlayıcı qurğuların gücü trotil ekvivalentində təxminən 15 kq olub.

“Mütəxəssislər partlayıcı qurğuların xaricdə istehsal olunan plastik partlayıcı maddələrlə təchiz olunduğunu müəyyən ediblər. Onların gücü təxminən 15 kq trotil ekvivalenti olub. Çox vacib olan odur ki, partlayış zamanı Ukrayna istehsalı olan idarəetmə blokundan istifadə edildiyi müəyyən edilib”, – Bastrıkin söyləyib.

Onun sözlərinə görə, müstəntiqlər körpünün partladıldığı Bryansk vilayətində üç partlayıcı qurğunun yerini müəyyənləşdiriblər. Eyni zamanda, o qeyd edib ki, iyunun 1-də Bryansk vilayətində baş vermiş ikinci terror aktı zamanı dəmiryol relsləri altında quraşdırılmış 5 PUA partladılıb. “Partlayıcı qurğuların partlaması bilavasitə lokomotivin altında baş verib. İstintaq Komitəsinin rəhbərinin sözlərinə görə, hadisə yerində daha iki partlamamış partlayıcı qurğu aşkarlanıb”, – Bastrıkin vurğulayıb.

O həmçinin qeyd edib ki, Kursk vilayətində dəmir yolunda da beş partlayıcı qurğu işə salınıb. “Hadisə yerinə baxış keçirilərkən müəyyən edilib ki, 5 əldəqayırma partlayıcı qurğu eyni vaxtda dəmiryol relslərində və dəmir yolu körpüsünün dayaqları altında işə salınıb. Ekspertlər partlayıcı qurğuların xaricdə istehsal olunan plastik partlayıcı maddələrlə doldurulduğunu müəyyən ediblər”, – Rusiya İstintaq Komitəsinin rəhbəri əlavə edib.