Mingəçevir bələdiyyəsi növbəti məhəllədə abadlıq işlərinə başlayıb

Mingəçevir bələdiyyəsi növbəti məhəllədə abadlıq işlərinə başlayıb

Mingəçevir şəhərində yeni tərkibdə formalaşan bələdiyyə artıq növbəti  layihəyə start verib. Şəhərin 20 Yanvar küçəsində yerləşən və uzun müddət istifadəsiz qalan həyətyanı sahədə təmir-bərpa və abadlaşdırma işlərinə başlanılıb. Sakinlərin birbaşa müraciəti əsasında həyata keçirilən bu təşəbbüs, yerli özünüidarəetmənin icmalarla daha sıx əməkdaşlıq etməyə başladığını göstərir.

Bələdiyyə sədri Anar İsmayılovun sözlərinə görə, ərazi tamamilə yenidən qurulur: parkda oturacaqlar və söhbətgahlar rənglənir, uşaq və böyüklər üçün nəzərdə tutulmuş istirahət zonaları müasir üslubda tərtib olunur. Bununla yanaşı, ətraf mühitin təhlükəsizliyi də diqqətdən kənarda qalmayıb – ərazidə təhlükə törədən quru və qırıq ağaclar Yaşıllaşdırma İdarəsinin əməkdaşları tərəfindən budanaraq ətraf mühitə uyğunlaşdırılır.

Layihənin həyata keçirilməsində Mingəçevir Şəhər İcra Hakimiyyətinin dəstəyi də mühüm rol oynayır. İcra başçısı İlham İsmayılov bələdiyyənin fəaliyyətinə dəstək verərək, şəhərin ümumi inkişaf strategiyası ilə uyğun addımların atılmasını təmin edir.

Abadlaşdırma işləri hazırda davam etdirilir. Layihənin növbəti mərhələsində isə şəhərin Nəriman Nərimanov küçəsində yerləşən digər baxımsız ərazilərin də park və istirahət zonalarına çevrilməsi nəzərdə tutulur. Bu isə o deməkdir ki, bələdiyyə yalnız cari problemləri həll etməklə kifayətlənməyəcək, eyni zamanda şəhərin uzunmüddətli inkişafına da töhfə verəcək.

Mingəçevirin sakinləri yeni bələdiyyədən aktivlik və şəffaflıq gözləyir. Bu baxımdan, 20 Yanvar küçəsində aparılan abadlaşdırma işləri həm simvolik, həm də real nəticələrə gətirib çıxara biləcək bir başlanğıc kimi qiymətləndirilir.

Xatırladaq ki, bu layihə Mingəçevir Bələdiyyəsinin yeni tərkibdə formalaşdıqdan sonra həyata keçirdiyi ilk genişmiqyaslı ictimai təşəbbüsdür.

Esmira Hidayətova, Mingəçevir