7 iyul 2025-ci il tarixində Beynəlxalq Diaspora Mərkəzinin (BDM) ofisində Mərkəzin İdarə Heyətinin bir neçə üzvü və departament rəhbərlərinin iştirakı ilə xüsusi toplantı keçirilmişdir.
bdmxeber.az xəbər verir ki, Görüşün əsas mövzusu Azərbaycan Respublikasının Prezidenti cənab İlham Əliyevin İqtisadi Əməkdaşlıq Təşkilatının 17-ci Zirvə görüşündə səsləndirdiyi və Qərbi azərbaycanlıların doğma torpaqlarına dinc yolla qayıdış hüququ ilə bağlı bəyanatı olmuşdur.
Cənab Prezident çıxışında xüsusi olaraq vurğulamışdır:
“Ermənistandan deportasiya olunmuş Qərbi azərbaycanlıların hüquqlarının təmin olunması böyük əhəmiyyət kəsb edir. Keçən ay İslam Əməkdaşlıq Təşkilatının İstanbulda keçirilmiş Nazirlər Şurasında Ermənistandan zorla didərgin salınmış azərbaycanlıların qayıdış hüququna dəstək ifadə edən qətnamənin bütün 57 üzv ölkənin yekdil qərarı ilə qəbul olunmasını yüksək qiymətləndiririk. Bu qətnamə ilə yanaşı, Nazirlər Şurasının yekunlarına dair “İstanbul Bəyannaməsi”ndə də indiki Ermənistan ərazisindən zorla qovulmuş azərbaycanlıların geri qayıdış hüququ təsdiqlənir və Ermənistanın Qərbi Azərbaycan İcması ilə dialoqu rədd etməsi qınanılır.”
Prezident İlham Əliyev bəyan etmişdir ki, Qərbi azərbaycanlıların Ermənistan ərazisindəki tarixi dədə-baba yurdlarına sülh yolu ilə qayıdışının təmin olunması istiqamətində səylər ardıcıl şəkildə davam etdiriləcək.
Görüşdə çıxış edən Beynəlxalq Diaspora Mərkəzinin sədri İsmayıl Ağayev cənab Prezidentin bu qətiyyətli mövqeyini yüksək dəyərləndirərək bildirmişdir:
“Cənab Prezidentin İƏT-in Zirvə görüşündə səsləndirdiyi fikirlər bir daha göstərir ki, dövlətimizin başçısı Qərbi azərbaycanlıların hüquqlarının bərpasını təkcə milli deyil, həm də beynəlxalq müstəvidə strateji bir məsələ kimi gündəmdə saxlayır. Biz, Qərbi Azərbaycandan olan ictimaiyyət nümayəndələri, bu prosesə həmrəy şəkildə dəstək verərək, hüquqi, diplomatik və informasiya platformalarında bu məsələni fəal şəkildə irəli aparmalıyıq.”
BDM sədrinin birinci müavini, siyasi elmlər üzrə fəlsəfə doktoru Dr. Ceyhun Şakiroğlu isə çıxışında qeyd etmişdir:
“Cənab Prezidentin çıxışı təkcə siyasi bəyanat deyil, bu, milli ideologiyanın əsas istiqamətlərindən birinin – deportasiya olunmuş soydaşlarımızın dinc və qanuni şəkildə geri qayıdışının dövlət səviyyəsində qəbul olunduğunun göstəricisidir. Biz Diaspor Mərkəzi olaraq bu prosesi möhkəm hüquqi baza və beynəlxalq təbliğatla dəstəkləməyə hazırıq. Bu, tarixi ədalətin bərpası üçün yeni mərhələnin başlanğıcıdır.”
Görüş iştirakçıları yekdilliklə qərara aldılar ki, Prezidentin çağırışları əsasında fəaliyyət planı hazırlansın, beynəlxalq təşkilatlarla əlaqələr gücləndirilsin və Qərbi azərbaycanlıların hüquqlarının müdafiəsinə yönəlmiş tədbirlərin miqyası genişləndirilsin.
Görüşdə Hüseynova Elmira Məmməd qızı – “Mədəniyyət Departamenti”nin rəhbəri, Şirinova Qızbəz İmran qızı – “Şəhid və Qazi Ailələri ilə İş və Sosial Dəstək Departamenti”nin rəhbəri, Tağıyeva Hicran – “Şəhid və Qazi Ailələri ilə İş və Sosial Dəstək Departamenti”nin müavini, Qəhrəmanova Ləman – “Mədəniyyət Departamenti”nin müavini və Şirəliyeva Ceyhunə – BDM İdarə Heyətinin üzvü, Qərbi Azərbaycan Paşalı rayonunun Terp kəndi icmasının sədri iştirak etdi.
Görüş iştirakçıları öz çıxışlarında BDM ailəsi olaraq cənab Prezidentin yanında olduqlarını, onun Qərbi Azərbaycanla bağlı verdiyi bəyanatları tam dəstəklədiklərini və bu istiqamətdə görüləcək işlərə hazır olduqlarını bildirmişlər.
