bdmxeber.az xəbər verir ki, 06 iyul 2025-ci il tarixində Beynəlxalq Diaspora Mərkəzinin (BDM) ofisində əslən Qərbi Azərbaycandan olan tanınmış iş adamı Vaqif Cəfərov, BDM sədri İsmayıl Ağayevin qonağı oldu.
Görüş zamanı İsmayıl Ağayev zəhmət çəkib dəvəti qəbul edərək BDM-in ofisinə təşrif buyurduğuna görə Vaqif bəyə təşəkkürünü bildirdi. O, qonaqlara məlumat verərək qeyd etdi ki, Vaqif Cəfərov və onun ailə üzvləri Qarabağın azadlığı uğrunda aparılan mübarizədə fəal iştirak etmişlər.
İsmayıl Ağayev əlavə etdi ki, Vaqif bəyin ailəsi 1948–1953-cü illərdə doğma yurdlarından – Qərbi Azərbaycandan deportasiya olunaraq Azərbaycanın Yevlax şəhərində məskunlaşmışdır.
Tale elə gətirmişdir ki, bu gün Vaqif Cəfərov doğmaları ilə birlikdə iş adamı kimi fəaliyyət göstərir və Qarabağın yenidən qurulması prosesinə öz töhfəsini verir.
Daha sonra çıxış edən iş adamı Vaqif Cəfərov göstərilən diqqət və səmimi qəbula görə BDM sədri İsmayıl Ağayevə və görüşdə iştirak edən diaspora nümayəndələrinə dərin təşəkkürünü bildirdi. O vurğuladı ki, belə görüşlər yalnız fərdi deyil, ümummilli baxımdan da mühüm əhəmiyyət daşıyır:
“Mən Qərbi Azərbaycandan deportasiya olunmuş bir ailənin övladı olaraq bu gün burada – belə dəyərli bir təşkilatın ofisində olmaqdan və milli məqsədlər uğrunda çalışan insanlarla bir araya gəlməkdən böyük qürur duyuram. Qarabağ və Qərbi Azərbaycan bizim milli yaddaşımız və mənəvi borcumuzdur. Əlimdən gəldiyi qədər çalışıram ki, bu müqəddəs torpaqların bərpası və diaspora fəaliyyətlərinin gücləndirilməsi istiqamətində faydalı olum.”
O, əlavə etdi ki, hər bir azərbaycanlı, xüsusilə də ölkə daxilində və xaricdə uğur qazanan iş adamları milli məsuliyyət hissi ilə hərəkət etməli, Vətənin yenidən qurulmasına və onun həqiqətlərinin dünyaya çatdırılmasına töhfə verməlidir.
Sonda bir daha minnətdarlığını ifadə edən Vaqif Cəfərov qeyd etdi ki, Beynəlxalq Diaspor Mərkəzi kimi qurumların təşəbbüsləri Qərbi Azərbaycana qayıdış prosesinin ictimai-siyasi əsaslarının möhkəmlənməsində mühüm rol oynayır.
Görüşün sonunda BDM sədri İsmayıl Ağayev, Vaqif Cəfərova Azərbaycan diasporuna, Qərbi Azərbaycana qayıdış məsələsinə və Qarabağın yenidən bərpası istiqamətində göstərdiyi fəallığa görə Fəxri Fərman təqdim etdi.
