Xankəndidə “Konstitusiya və Suverenlik İli”nə həsr olunmuş QHT Əməkdaşlıq Forumu keçirilib

2025-ci il oktyabrın 19–20-də Xankəndi şəhərində “Konstitusiya və Suverenlik İli” çərçivəsində Azərbaycan Qeyri-Hökumət Təşkilatlarının Əməkdaşlıq Forumu təşkil olunub.

bdmxeber.az AZƏRTAC-a istinadən xəbər verir ki, tədbirin rəsmi açılış mərasimi oktyabrın 20-də Xankəndi Konqres Mərkəzində baş tutub. Forumun proqramında “Dünyaya açılmış Azərbaycan QHT-ləri: təklənməyə qarşı birləşmə texnikası”, “WUF13-ə doğru: QHT-lər üçün yeni imkanlar”, “Rəqəmsal QHT konsepsiyası: süni intellekt və rəqəmsal həllər” və “Türkman irsi: tarixi köklərə sədaqət” adlı panel müzakirələri keçirilib. Forumun sonunda bədii hissə nümayiş etdirilib.

Forumun gedişində çıxış edən Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva bildirib ki, Qlobal Cənub QHT Platformasının təsis edilməsi Azərbaycan QHT-lərinin beynəlxalq arenada tanınmasında mühüm dönüş nöqtəsi olub. Onun sözlərinə görə, bu təşəbbüsə 116 ölkədən 120 nümayəndə şəxsən, 137 ölkədən isə 1023 nümayəndə imza ilə dəstək verib.

Aygün Əliyeva əlavə edib ki, Agentlik dövlət, özəl sektor və QHT-lər arasında əməkdaşlıq mexanizmlərinin qurulması istiqamətində mühüm addımlar atıb. Ekologiya və Təbii Sərvətlər Nazirliyi, Qarabağ Dirçəliş Fondu və bp şirkəti ilə birgə həyata keçirilən layihələr bu əməkdaşlığın uğurlu nümunələrindəndir.

İcraçı direktor həmçinin qeyd edib ki, QHT-lərin inkişaf və mübadilə proqramları uğurla davam etdirilir. 6-cı mərhələ oktyabrın 18–19-da Şuşa şəhərində yekunlaşıb. Qərbi Azərbaycanlıların Qayıdış Konsepsiyası ilə bağlı təşəbbüslərə dəstək məqsədilə bu günədək 100-dən çox layihəyə maliyyə ayrılıb. Prezident İlham Əliyevin tövsiyəsinə uyğun olaraq, 2026-cı il qrant müsabiqələrində də bu istiqamətə xüsusi diqqət yetiriləcək.

Forumda iştirak edən Beynəlxalq Diaspora Mərkəzinin (BDM) sədri İsmayıl Ağayev QHT rəhbərləri ilə görüşərək Azərbaycan diasporasının inkişafı, Zəngəzur dəhlizinin regional əhəmiyyəti və Qərbi azərbaycanlıların tarixi torpaqlarına qayıdışı mövzularında fikir mübadiləsi aparıb. O, həmçinin qeyd edib ki, QHT-lərin birgə fəaliyyəti milli həmrəyliyin möhkəmlənməsinə və beynəlxalq aləmdə Azərbaycanın mövqelərinin daha da güclənməsinə xidmət edir.