BDM-in təşəbbüsü ilə Çexiyada keçiriləcək “Qərbi Azərbaycanlıların öz vətənlərinə repatriasiyası: Avropa təcrübəsi” layihəsinə hazırlıq məqsədilə dəyirmi masa təşkil olunub
03 oktyabr 2025-ci il tarixində Beynəlxalq Diaspora Mərkəzinin (BDM) ofisində, BDM-in təşkilatçılığı və Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə həyata keçirilən layihə çərçivəsində Çexiyada keçiriləcək «Qaçqınların öz vətənlərinə repatriasiyası: Avropa təcrübəsi» adlı tədbirə hazırlıq məqsədilə dəyirmi masa təşkil olunmuşdur.
Tədbiri giriş sözü ilə açan BDM sədri İsmayıl Ağayev iştirakçıları şəhidlərin əziz xatirəsini bir dəqiqəlik sükutla yad etməyə dəvət etdi. Daha sonra Ağayev BDM-in Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə Çexiyada həyata keçiriləcək «Qaçqınların öz vətənlərinə repatriasiyası: Avropa təcrübəsi» adlı layihəsi barədə iştirakçılara ətraflı məlumat verdi. O, həmçinin BDM-in indiyədək gördüyü işlər və təşkil etdiyi tədbirlər barədə geniş çıxış etdi.
Sonra söz Vətəndaşların Sosial Rifahı Naminə İctimai Birliyinin sədri İradə Rizazadəyə verildi. İradə xanım çıxışında qərbi azərbaycanlıların tarixi taleyinə toxunaraq bildirdi ki, onların ata-baba yurdlarından deportasiya olunması xalqımızın yaddaşında silinməz izlər buraxıb. O qeyd etdi ki, əsrlər boyu Zəngəzur, Göyçə, İrəvan və digər bölgələrdə yaşayan azərbaycanlıların öz torpaqlarına dönüşü təkcə humanitar məsələ deyil, həm də tarixi ədalətin bərpasıdır. İradə Rizazadə layihənin bu baxımdan böyük əhəmiyyət daşıdığını vurğulayaraq, beynəlxalq təcrübənin öyrənilməsinin repatriasiya prosesinə mühüm töhfə verəcəyini qeyd etdi. O, həmçinin Beynəlxalq Diaspora Mərkəzinin bu istiqamətdə gördüyü işləri yüksək qiymətləndirərək inamla bildirdi ki, bu layihə də layiqincə həyata keçiriləcəkdir.
Daha sonra söz Beynəlxalq Diaspora Mərkəzinin Aparat rəhbəri, Dr. Ceyhun Şakiroğluna verildi. O, çıxışında layihənin elmi-nəzəri əsaslarına toxunaraq repatriasiya prosesində beynəlxalq təcrübənin öyrənilməsinin vacibliyini vurğuladı. Dr. Ceyhun Şakiroğlu qeyd etdi ki, qərbi azərbaycanlıların öz doğma torpaqlarına dönüşü həm tarixi ədalətin bərpası, həm də milli birliyin möhkəmlənməsi baxımından xüsusi əhəmiyyət kəsb edir. O, BDM-in bu istiqamətdə apardığı işlərin davamlı olacağını və yeni layihələrlə daha geniş miqyasda həyata keçiriləcəyini diqqətə çatdırdı.
Ardınca Deportasiya Qurbanları İctimai Birliyinin sədri Köçəri Nağıbəyli çıxış edərək qərbi azərbaycanlıların zorla doğma yurdlarından didərgin salınmasının xalqımızın tarixi yaddaşında ağır bir faciə olduğunu vurğuladı. O qeyd etdi ki, bu həqiqətlərin dünya ictimaiyyətinə çatdırılması və repatriasiya prosesinin ədalətli şəkildə həyata keçirilməsi üçün birgə səylər vacibdir.
Turan Birliyi İctimai Birliyinin icraçı direktoru Bəxtiyar Rzayev çıxışında türk dünyasının həmrəyliyinin və qarşılıqlı dəstəyinin qərbi azərbaycanlıların haqq işində mühüm rol oynadığını qeyd etdi. O, bu cür layihələrin milli həmrəyliyin güclənməsinə və tarixi ədalətin bərpasına xidmət etdiyini vurğuladı.
Ardınca Yeni Baxış İctimai Nəzarət Birliyinin sədri Şahvələd Əsgərova söz verildi. O, çıxışında ictimai təşkilatların repatriasiya məsələsində üzərinə düşən məsuliyyətlərdən danışaraq, bu prosesdə ictimai nəzarətin gücləndirilməsinin vacibliyini qeyd etdi. Şahvələd Əsgərov bildirdi ki, qərbi azərbaycanlıların tarixi torpaqlarına dönüşü ilə bağlı aparılan işlərin şəffaf və ardıcıl şəkildə həyata keçirilməsi xalqın inamını möhkəmləndirəcəkdir. O, həmçinin BDM-in bu sahədə gördüyü işləri yüksək qiymətləndirərək, vətəndaş cəmiyyəti institutlarının bu təşəbbüslərə dəstəyinin vacibliyini vurğuladı. Bu baxımdan, belə tədbirlərin mütəmadi keçirilməsinin əhəmiyyətini xüsusi qeyd etdi.
Daha sonra söz Türk Turan Birliyi İctimai Birliyinin sədri Qızbəz Şirinovaya verildi. O, çıxışında qadınların milli məsələlərdə fəal iştirakının və tarixi yaddaşın qorunmasının önəmini qeyd etdi. Həmin birliyin Qadınlar Şurasının sədri Zəkiyyə Həziyeva isə layihənin ictimai nəzarət və qadınların fəallığı baxımından əhəmiyyətini vurğuladı.
Tədbirin sonunda Beynəlxalq Diaspora Mərkəzinin layihə çərçivəsində hazırladığı sərgiyə baxış keçirildi və xatirə şəkli çəkildi.
