Dəmir yolunun lap kənarında təhlükə saçan tiklilər sökülməlidir -AÇIQLAMA

Dəmir yolunun lap kənarında təhlükə saçan tiklilər sökülməlidir -AÇIQLAMA

30 il vəzifəli şəxslər göz yumub

 Dəmir
yollarının ətrafında qanunsuz tikintilər uzun illərdir davam edən problemlərdən
biridir. Əsasən Abşeron dairəvi xətti üzrə dəmir yolu, o cümlədən Nərimanov-Böyükşor,
Keşlə sahələrində mühafizə zolağını nəzərə almadan tikilən evlər ciddi təhlükə
törədir.

Hazırda ərazidə 161 qeyri-qanuni tikilmiş
ev var. Burada ümumilikdə 156 ailə, 543 nəfər yaşayır. Araşdırma göstərir ki,
yaşayan şəxslər Azərbaycanın 40 şəhər və rayonunu təmsil edirlər. Onlardan
yalnız 12-si keçmiş məcburi köçkün ailəsidir.

Bunlardan 54 ailənin başqa ünvanda evi var.
11 nəfər isə oradakı evini kirayəyə verib.

Qanunsuz tikililər nəqliyyat təhlükəsizliyinə
necə təsir edir?

Qeyd edək ki, evlər sənədsizdir,
qeyri-qanuni tikilib. Dəmir yolunun mühafizə zolağında yerləşən bu evlər dəmiryolu
nəqliyyatına ciddi problemlər yaratmaqla yanaşı, sakinlərin həyatı üçün də təhlükəlidir.

Belə ki, son 3 ildə dəmiryolunun mühafizə
zolağında yerləşən ərazilərdə çoxsaylı bədbəxt hadisə baş verib, 30-dan artıq
adam həyatını itirib və ya ağır xəsarət alıb.

Bundan başqa, yanğınsöndürən, təcili tibbi
yardım maşınları əraziyə daxil ola bilmir. Kommunal xidmət çox aşağı səviyyədədir,
işin müvafiq qaydada təşkili mümkün deyil. Buna görə də antisanitariya mühiti
mövcuddur.

Eyni zamanda, tikinti normalarına uyğun
olmayan bu evlər şəhərin ümumi görünüşünü pozur.

Məsələyə münasibət bildirən “Bələdiyyələrin
fəaliyyətinin təbliği” İctimai Birliyinin sədri Vüqar Tofiqli Sherg.az-a söyləyib
ki, qanunsuz tikilmiş, sənədləşdirilməmiş yaşayış sahələrinin formalaşması müəyyən
dövrlərdə bəzi vəzifəli şəxslərin səhlənkarlığı, məsuliyyətsizliyi və şəxsi
maraqları nəticəsində baş verib:

“Burada sual yaranır ki, bu tip tikililər,
xüsusilə dəmir yolu xətlərinin yaxınlığında yerləşən və 20-30 il və ya daha əvvəl
inşa edilən obyektlər, həmin dövrdə Dəmir Yolu İdarəsi, hüquq-mühafizə
orqanları və ya digər səlahiyyətli qurumlar tərəfindən qeydə alınmayıbmı? Eyni
zamanda, bu dövrdə rayon icra hakimiyyətinin də prosesdən xəbərsiz olması real
görünmür. Aydın şəkildə bəllidir ki, bu kimi halların böyük əksəriyyəti səlahiyyətli
şəxslərin səssiz razılığı və fərdi maraqları əsasında həyata keçirilib. Bununla
belə, nəzərə almaq lazımdır ki, həmin ərazilərdə vətəndaşlar artıq 20-30 ildir
ki, yaşayırlar. Bu səbəbdən də mövcud vəziyyətin həlli zamanı sosial
narazılığın yaranmaması üçün vətəndaşların hüquq və mənafeləri nəzərə alınmalı,
mümkün olduğu halda kompensasiya mexanizmləri tətbiq edilməlidir. Dövlət
orqanlarının əsas məqsədi ölkə rəhbərinin tələblərinə uyğun olaraq vətəndaş hər hansı inzibati addım vətəndaş
məmnunluğunu pozursa, bu, yolverilməzdir. Qeyd olunan məsələlərin kompleks şəkildə
nəzərdən keçirilməsi və kompromis həll yollarının tətbiqi ilə bu prosesin
optimal nəticəyə yönəldilməsi məqsədəuyğundur”.

https://sherg.az/hadise/311734