“Azərbaycan bütün regional və qlobal proseslərdə özünü suveren dövlət kimi təsdiq edir”

Dövlət başçısı İlham Əliyevin hər bir müsahibəsi mühüm çağırışlarla zəngindir. Bu baxımdan cənab Prezidentin “Əl-Ərəbiyyə” telekanalına müsahibəsi hazırda ölkə və dünya mətbuatında geniş işıqlandırılır. Ölkə rəhbəri “Əl-Ərəbiyyə” televiziya kanalına müsahibəsi ilə bir çox məsələlərə aydınlıq gətirdi, mühüm tarixi və siyasi məqamları diqqətə çatdırmaqla yanaşı, yeni şəraitdə həm regional, həm də beynəlxalq təhlükəsizlik və əməkdaşlıqla əlaqədar Azərbaycanın mövqeyini aydın ifadə etdi. Dövlət başçısının cavablarında Azərbaycanın müstəqil mövqeyinin, balanslaşdırılmış siyasətinin və ədalətli yanaşmasının bariz nümunəsini gördük.
Bu fikirləri saytımıza açıqlamasında Milli Məclisin üzvü Tamam Cəfərova deyib.
O, qeyd edib ki, Cənab İlham Əliyev müsahibədə bir daha diqqəti Vaşinqtonda əldə olunan tarixi sülh razılaşmasına yönəldərək bildirdi ki, avqustun 8-də ABŞ-da baş verən hadisələr, əslində, qarşıdurmanın və gərginliyin sonu deməkdir. Azərbaycan və Ermənistanın Ağ Evdə Prezident Trampın iştirakı ilə bu sənədi paraflaması müharibənin başa çatdığını göstərir. Bu, mərhələlərlə 30 ildən artıq davam edən müharibənin sonudur və həm Cənubi Qafqaz regionu, həm də daha geniş mənada Mərkəzi Asiya və Yaxın Şərq üçün tamamilə yeni imkanlar açır.
Deputat onu da vurğulayıb ki, Prezident İlham Əliyev müsahibədə Vaşinqtonda əldə olunan digər tarixi razılaşmadan – Zəngəzur dəhlizinin açılmasına xüsusi diqqət göstərdi: “Cənab İlham Əliyev bildirdi ki, Prezident Donald Tramp və onun komandası sülh prosesinə cəlb olunduqda, vasitəçilik etmək istəyəndə biz onlara belə mesaj verdik: Zəngəzur dəhlizi fəaliyyətə başlamalı və təhlükəsiz olmalıdır. Yəni, Azərbaycan vətəndaşları bu 40 kilometrdən çox məsafəni təhlükəsiz keçə bilməlidirlər, güclü təhlükəsizlik zəmanətləri olmalıdır. Beynəlxalq təhlükəsizlik zəmanətləri təmin edilməlidir. Yalnız Ermənistanın verdiyi zəmanətlər kifayət deyil. Tramp administrasiyası bu qanuni narahatlığı doğru şəkildə qəbul etdi və bunun nəticəsində TRIPP (“Trampın Beynəlxalq Sülh və Rifah Marşrutu”) meydana gəldi. Cənab İlham Əliyev bu layihənin çox yaxın zamanda reallaşacağına əminliyini ifadə etdi. O da vurğulandı ki, dəmir yolunun tikintisi uzun vaxt tələb etməməlidir, çünki məsafə cəmi 42 kilometrdir. Əgər biz tikməli olsaq, bir il ərzində tamamlayardıq. Ermənistan üçün isə bəlkə də daha bir neçə il lazım olacaq, çünki dəmir yolu tikintisi sahəsində bizim təcrübəmiz daha çoxdur”.

Tamam Cəfərova ölkəmizin başçısının müsahibəsində Azərbaycanda tolerantlıq mühitinin olduğunu, müxtəlif etnik qrupların bir ailə kimi ümumi dəyərlərə sadiq qaldığını da qeyd edib. Dövlətimizin başçısı, həmçinin son zamanlar Rusiya-Azərbaycan münasibətlərində yaranmış gərginliyin də məhz qarşı tərəfin məhsuliyyəti öz üzərindən atmaq cəhdi və ölkəmizə, xüsusən də bu ölkədə yaşayan soydaşlarımıza qarşı aqressiya ilə bağlı olduğunu bildirib. Azərbaycana məxsus sərnişin təyyarəsinin Rusiya ərazisində vurulmasına görə bütün məsuliyyətin bu ölkənin üzərinə düşdüyü vurğulanıb. Azərbaycan məsuliyyətli dövlət kimi hər zaman ortaya çıxan məsələlərdə heç vaxt öz məsuliyyətindən imtina etməyib. Ona görə də, bu gün Azərbaycanla bağlı məsələlərdə atılacaq addımlar daha çox qarşı tərəfin məsuliyyət dairəsinə aiddir. Eyni zamanda, Prezident İlham Əliyev müsahibəsində türk dövlətləri arasında birliyin günü-gündən möhkəmləndiyini və bunun sülhə əməkdaşlığa söykəndiyini, Türk Dövlətləri Təşkilatının artan mövqeyindən bəhs edib.
Ümumilikdə, ölkə Başçısının müsahibəsi Azərbaycanın beynəlxalq münasibətlərdəki mövqeyini aydın və dolğun şəkildə ifadə etdi. Burada iki mühüm məqam ön plana çıxır: birincisi, Azərbaycan bütün regional və qlobal proseslərdə özünü suveren dövlət kimi təsdiq edir; ikincisi, ölkəmiz balanslaşdırılmış siyasət yürüdərək həm qonşularla, həm də böyük güclərlə münasibətlərdə ədaləti və bərabərliyi əsas prinsip kimi ortaya qoyur. Bu müsahibə həm də Azərbaycanın sülh təşəbbüslərinin, əməkdaşlıq çağırışlarının və eyni zamanda milli maraqları hər şeydən üstün tutan qətiyyətli mövqeyinin ifadəsi idi.

Ölkə Başçısının müsahibədə söylədiyi fikirlərə əsasən deyə bilərik ki, bu, həmçinin, Azərbaycan diplomatiyasının mahiyyətini əks etdirir: ədalət, qarşılıqlı hörmət, milli maraqlara sadiqlik və balanslı siyasət. Prezident İlham Əliyevin qətiyyətli sözləri bir daha sübut edir ki, Azərbaycan müstəqil siyasi kursunu davam etdirir və regionda yalnız sülh, əməkdaşlıq və qarşılıqlı fayda üzərində qurulan münasibətlərə üstünlük verir.