RİH-lərin ləğvi zəruriətə çevrilsə də…

RİH-lərin ləğvi zəruriətə çevrilsə də…

Bələdiyyələrə
əlavə səlahiyyətin verilməsi sual altında ola bilər

Sabiq
millət vəkili Vahid Əhmədov bu günlərdə mediaya açıqlamasında deyib ki, RİH-lərin
ləğv edilməsi üçün “birincisi, Konstitusiyada dəyişiklik olunmalıdır. 

İkincisi,
Azərbaycanda olan 14 iqtisadi rayonun hər biri üzrə xüsusi nümayəndə təyin
olunmalıdır. Bununla yanaşı, bələdiyyələrin statusu məsələsinə baxmaq lazımdır.
Bu qurumlara kifayət qədər geniş səlahiyyətlər vermək lazımdır ki, onların
imkanları artsın və Türkiyə modelinə yaxınlaşsın. Yəni elə şərait
yaradılmalıdır ki, bələdiyyələr söz sahibi olsun, bütün sosial məsələlərə
baxsın və onları həll etsin. Çünki bələdiyyə çox əhəmiyyətli bir orqandır.
Baxmayaraq ki, 1999-cu ildə yaranıb, kifayət qədər müddət keçməsinə baxmayaraq,
hələ də bu institut tam formalaşmayıb”.

Beləliklə,
bizim də əvvəllər dəfələrlə söylədiyimiz fikirlərin sabiq millət vəkili Vahid
Əhmədov tərəfindən  bu gün yenidən dilə gətirməsi,
fikrimcə, heç də təsadüfü deyil.

Xatırladım
ki, RİH-lərin ləğvi ilə bağlı ilk addım Gəncə şəhərində təsis edilmiş iki
rayonun ləğvi ilə başlasa da davamı gəlmədi.

Deməliyəm
ki, RİH-lərin ləğv edilməsi ölkəmizdə nümayəndəlik institutunun yaradılması ilə
daha da aktuallaşdı. Ancaq nümayəndəlik sisteminin tətbiqinədək RİH-lərə aid
edilən səlahiyyətlərin xeyli bir hissəsi artıq onlardan alınmışdı.  Bu gün bu tipli açıqlamaların media üzərindən  yayılması “nümayəndəlik sisteminin ölkə üzrə
tətbiqinə başlamaq olar” anlamına gəlir.

Ancaq
bu günlərdə bu versiya ilə yanaşı, nümayəndəlik sisteminə keçid olsa da, RİH-lərin  memarlıq şöbələrinin və “RJU” ların  birləşdirilərək Şəhərsalma və Arxitektura Kömitəsinə
birləşdirilməsi də məsələsi də gündəmə gəlib. Məsələnin bu şəkildə həllinin
real görünməsi isə o deməkdir ki, hələ ki bələdiyyələrə bizim fikrimizdə
tutduğumuz səlahiyyətlərin verilməsi gündəmdə olmaya bilər.

Əlavə
edim ki, bütün mərkəzi icra orqanları bu günədək  özlərinə münasib şəkildə regional idarələr
yaradıblar. Təəsüfedici fakt odur ki, təsis edilən regional idarələr pərakəndə
şəkildə yaradılıb. Bəzi  qurumların iki və
üç istiqamətdə regional idarələrinin yaradılması məsələsinə izah tapmaq mümkün
deyil. 

Hər
halda idarəetmədə struktur dəyişikliyinin edilməsi ölkəmizdə bu gün  zəruriətə çevrilib. Demək olar ki, səlahiyyəti
belə qalmayan RİH başçılarının  fəaliyyəti
 cəmiyyətdə birmənalı olaraq qəbul
edilmir. Heç bir səlahiyyəti olmayan başçıların bu və digər hallarda bələdiyyələrin
fəaliyyətinə birbaşa və dolayısi ilə müdaxiləsi isə belə məqamda başa düşüləndir.

Hər
halda cəmiyyət RİH-lərin ləğvini səbrsizliklə gözləyir. Ya bu qurumlara səlahiyyət
verilməli, ya da ləğv edilməlidir. Fikrimcə, bu qurumların ləğv edilərək  regional idarəetməyə keçid etməklə, yerli əhəmiyyətli
səlahiyyətlərin bələdiyyələrə verilməsi daha məqsədəuyğun ola bilərdi.

Sonda  onu da deməliyəm ki, RİH-lərin ləğvi və regional
idarəetmə strukturunda pərakəndəliyin aradan qaldırılması, həm də  kifayət qədər büdcə vəsaitlərinin qənaətinə
imkan verəcəkdir.

Nə isə.
Gözləyək.

Vüqar Tofiqli