SON DƏQİQƏ! AZAL təyyarəsini vuranların adları təsdiqləndi

Rusiya Federasiyasının müstəqil media orqanı ASTRA, 2024-cü ilin dekabrında Qroznı yaxınlığında vurulan AZAL-a məxsus “Embraer 190” sərnişin təyyarəsi ilə bağlı “Minval Politika” tərəfindən irəli sürülmüş ittihamların doğruluğunu təsdiqləyib.

Turkustan.az xəbər verir ki, məlumata görə, təyyarənin vurulmasında adı keçən şəxslərin Rusiya Silahlı Qüvvələri ilə birbaşa əlaqəli olması artıq təsdiq olunub.

Raketin buraxılışında adı keçən üç zabit kimdir?

“Minval Politika”nın əvvəlki təhqiqatında təyyarənin vurulması zamanı döyüş növbətçiliyində olan və prosesə bilavasitə cəlb edilən üç yüksək rütbəli rus hərbçisinin adı çəkilmişdi:

Kapitan Dmitri Pudovkin – 51-ci Hava Hücumundan Müdafiə Diviziyasının baş naviqatoru

Polkovnik-leytenant Vladimir Yanovski – Cənub Hərbi Dairəsinin qərargahının operativ növbətçisi

Polkovnik Gennadi Eremenko – Rusiya Hərbi Hava Qüvvələrinin 4-cü bölməsinin nümayəndəsi

ASTRA-nın əldə etdiyi sızmalar bu şəxslərin Rusiya ordusunda aktiv şəkildə xidmət etdiyini və “Minval Politika”nın təqdim etdiyi bilgilərin faktiki baza ilə üst-üstə düşdüyünü sübut edib.

Sosial mediada və arxivlərdə izlər

Təhqiqat zamanı müəyyən olunub ki:

Dmitri Pudovkin 2020-ci ilə qədər 42352 saylı hərbi hissədə xidmət edib.

Vladimir Yanovski 2010-cu ildə Voronejdəki Jukovski adına Hərbi Hava Qüvvələri Akademiyasında müəllim kimi fəaliyyət göstərib.

Gennadi Eremenkonun sosial şəbəkələrdə paylaşılan 15 illik arxiv fotosunda Rusiya hərbi çiyin nişanları aydın görünür.

Dron raketini atan şəxs danışdı?

“Minval Politika”nın təqdim etdiyi başqa bir diqqətçəkən sübut, AZAL təyyarəsini vuran şəxslərdən biri sayılan kapitan Dmitri Paladiçukun audio mesajıdır. Səsyazma “Minval – LIVE” Telegram kanalında yayımlanıb.

ASTRA bu səsin həqiqətən də Paladiçuka aid olduğunu öz jurnalistlərinin onunla keçmişdəki danışıqları əsasında təsdiqləyib.

“Əgər Moskva məsuliyyət daşımaq istəmirsə, bu da bir cavabdır”

“Minval Politika”nın baş redaktoru Emil Mustafayev yayımlanan məlumatlarla bağlı belə açıqlama verib:

“Biz bu materialların yüz faiz doğru olduğunu heç zaman iddia etməmişik. Amma mövzunun cəmiyyət üçün əhəmiyyəti və həssaslığı bizi onu dərc etməyə vadar etdi. Azərbaycan tərəfinin apardığı araşdırmalara kömək məqsədilə hər bir sənədi təqdim etdik”.

E.Mustafayev bildirib ki, “Agentlik”, ASTRA və “The Insider” kimi nüfuzlu rus nəşrlərinin də bu məlumatların etibarlığını tanıması, yayılan sənədlərin ciddi əsaslara söykəndiyini göstərir.

Təəssüf doğuran məqam: şübhəlilər cəzalandırılmayıb, bəziləri vəzifə yüksəlişi alıb. Məsələnin ən qalmaqallı tərəfi ondan ibarətdir ki, adı çəkilən hərbi şəxslərin heç biri xidmətdən uzaqlaşdırılmayıb, rəsmi istintaq isə yalnız formal xarakter daşıyıb. Hətta “baş müttəhim” kimi təqdim olunan general Tolopilo, məlumatlara görə, cəzalandırılmaq əvəzinə vəzifədə yüksəldilib.

E.Mustafayev sonda ASTRA nəşrinə istintaqa verdiyi obyektiv dəstəyə görə təşəkkür edib və vurğulayıb ki, bütün faktlar artıq ortadadır. Azərbaycan prezidentinin tələb etdiyi kimi, Rusiya bu faciəyə görə məsuliyyəti öz üzərinə götürməli, günahkarları cəzalandırmalı və təzminat ödənilməlidir.

Bizim.Media