“Anadolu Qartalı-2025”də iştirak edən azərbaycanlı pilot: Hərbi təlimlərdə yüksək nailiyyətlər əldə etmişik

Azərbaycanın Hərbi Hava Qüvvələri (HHQ) artıq neçənci dəfədir ki, bu cür beynəlxalq təlimə qatılır.

Bunu “Report”un Konyaya ezam olunan əməkdaşına “Anadolu Qartalı-2025” beynəlxalq təlimində iştirak edən polkovnik-leytenant Sabir Nəsirov açıqlamasında deyib.

O bildirib ki, qardaş Türkiyə də daxil olmaqla digər təlimdə iştirak edən dövlətlərin nümayəndələri ilə fikir mübadiləsi aparırlar:

“İştirakçılarla praktiki və nəzəri biliklərimizi bölüşürük. Təlimdə iştirak etməkdə məqsədimiz hərbi biliklərimizi artırmaqdır. Yeni biliklər, xarici ölkələrin texnikalarını da öyrənməyə çalışırıq. Yaxşı nəticələr əldə edirik”.

Hərbi pilot onu da deyib ki, bundan əvvəl “Anadolu Ankası” və Qazaxıstanda hərbi təlimlərdə iştirak ediblər:

“Qatıldığımız hər bir təlimdə Azərbaycanı yaxşı tərəfdən təmsil etməyə çalışırıq. Həmin təlimlərdə yüksək nailiyyətlər əldə etmişik. “Anadolu Qartalı” təlimində müxtəlif ölkələr, həmçinin NATO qüvvələri iştirak edir. Təlimdə NATO taktikalarını da müşahidə edirik”.