BDM Sədri İsmayıl Ağayev Rauf Zeynini 65 illik yubileyi münasibətilə təbrik etdi
Hörmətli Rauf müəllim,
Sizi 65 illik yubileyiniz münasibətilə səmimi qəlbdən təbrik edirəm! Sizə möhkəm cansağlığı, ailə həyatınızda xoşbəxtlik, şəxsi və ictimai fəaliyyətinizdə isə yeni-yeni nailiyyətlər arzu edirəm.
Sizin həyat yolunuz, Vətənə və millətə xidmətiniz hər zaman bizim üçün böyük nümunə olmuşdur. Uzun illər ərzində Azərbaycan cəmiyyətindəki ictimai-siyasi fəaliyyətiniz və qeyri-hökumət təşkilatlarının inkişafındakı xidmətləriniz hər zaman yüksək qiymətləndirilib. Sizin zəhmətkeşliyiniz və fədakarlığınız xalqımız üçün nümunədir.
Sizin beynəlxalq diaspor sahəsindəki fəaliyyətiniz xüsusi diqqətə layiqdir. Mənim rəhbərlik etdiyim Beynəlxalq Diaspor Mərkəzinin qurucularından biri və İdarə Heyətimizin fəal üzvü olmağınızdan böyük qürur duyuram. Diaspor təşkilatlarımızın fəaliyyətinin gücləndirilməsində göstərdiyiniz dəstək və əzmkarlıq daim yaddaşlarda qalacaqdır.
Burada bir məqamı xüsusi olaraq qeyd etmək istəyirəm. Tale bizi eyni torpağın havasını udub, eyni suyu içib, eyni çörəyi yeyərək böyüdən insanlar kimi birləşdirdi. Zəngəzur və Dərələyəz mahalının övladları olaraq, valideynlərimizin mehriban qonşuluğu ilə keçən uşaqlıq illərimiz həmişə xatirələrimizdədir. Təəssüf ki, mənfur erməni vandalları və onların havadarları bizləri öz doğma yurdlarımızdan deportasiya etməyə məcbur etdilər. Lakin bu çətinliklər belə bizi qırmadı, əksinə, daha da möhkəmləndirdi və bizə həmrəylik ruhu bəxş etdi.
Uzun illərdir ki, biz xalq hərəkatından bu yana və qeyri-hökumət təşkilatlarında çiyin-çiyinə çalışırıq. Sizin ictimai-siyasi fəaliyyətiniz hər zaman mənim üçün örnək olmuşdur. Siz həm işinizdə, həm də şəxsi həyatınızda insanlara həmişə müəllimlik etmiş, bizə istiqamət vermisiniz. Dövlətimizə və millətimizə sədaqətlə xidmət göstərməkdə nümayiş etdirdiyiniz nümunə hər bir azərbaycanlı üçün qürur mənbəyidir.
Hörmətli Rauf müəllim,
Bir daha Sizi 65 illik yubileyiniz münasibətilə ürəkdən təbrik edir, Sizə uzun ömür, möhkəm cansağlığı, ailə səadəti və Vətənimizə xidmət yolunda yeni nailiyyətlər arzu edirəm. Sizinlə bu yolda çiyin-çiyinə addımlamaqdan böyük şərəf duyuram.
Hörmətlə,
İsmayıl Ağayev
Beynəlxalq Diaspor Mərkəzinin Sədri